Över uns
"Jümmers allerbest in Platt-Form"
CHARMONIA - Ierstmal mööt wü Jüch woll verklooren, wo düssen komischen Naamen herkummt :
Ischa man bloßen een Wortspeel, tausammensett' ut charmant un harmonisch, also 'n Överschrift för dat, wat Jü vun uns för'n Indruck kriegn künnt, wenn Jü dat Glück hebbt, uns up de Bühn tau beläven.
Anfongn het dat mit de Singerei all in't letzte Johrhunnert. Dirk un Peter harr'n in' Harvst 1990, na 14 Johrn Kauntrymusik mit de Bänd "Steam Roller" de Snut vull vun Cowboy- spälen, un dorvör Gitarrn, Klävier, Schlagtüüch un ossich schwoore Dröhnkastens up de Bühn tau asten. Schööne Musik künn man ja ok ohn dütt Brimborium maaken, äbn bloßen henstelln un singn. Inne Verwandschaft un Naverschaft würdn de annern veer Kierls rekruteert, wiel dat se gaud bi Stimm'n weern. Mit Heino, Klaus, Franz un Bernd hebbt Dirk un Peter denn jümmer Leeder inäuvt. Dat Programm harr vun allens 'n bäten wat: Oldies, Gospels, wat tau'n Höögen un wat taun Grübeln. Bekannte Leeder würdn för Gesang ümschräben un eegen Ideen tau Päpier bröcht. Väl vun düsse Songs hebbt wü 'n plattdüütschen Text verpasst, un düsse Wunnerwarkens inne neederdüütsche Dichtkunst hebbt denn Charmonia in't ganze platte Land bekannt maakt. Dat käum so gaud an, dat wü nu eegntlich blossen noch plattdüütsch singt, un dat wenn ´t sien mutt, över 90 Minuten lang.
Upmal weern wü ok fernseh- un radioaktiv. Bi de N3-Sendung Talk op Platt in' November 1997 flimmer de "lütte greune Kaktus" dat ierste Mal över dat Puschenkino, un de Lüüd wullen alle 'n CD köpen. De wür denn in Mai 1998 ferdich: 18 Leeder hebbt wü upnohmen ünner de Överschrift "Charmonia maakt allens platt". Dor hebbt sick de nordüütschen Radiostatschonen gliecks üm rääten, un hebbt uns in de plattdüütschen Sendungen haalt tau'n vörstelln.
Dat Fernsehn tröck nah mit Charmonia-Uptritte bi "Wunderschöner Norden", "Bi uns tu Hus", "Der fröhliche Norden" un ok jümmers wedder "Talk op platt". Uns' Gastspeel ut de ierste Sendung hebbt se ok in jümmer Jingle-Produktschon för "N3 Unterwegs" verarbeit, so dat uns Fratzen benah jedn Dag up'n Schirm weern.
Mit de tweete CD "Wenn dat Wiehnachten ward" wür denn 1999 äbenso gründlich dat Wiehnachtsfest plattmaakt.
Tau unsen 10. Geburtsdag in 2001 hebbt wü denn nochmal 16 Leeders vun "Land un Lüüd" up'n Speegelplatt braaden laaten.
Denn het dat ierstmal över fiev Johr duert, dat wü noch ´n Kunserv trechtkrägen hebbt. Anfang 2007 käum uns CD mit dann´Titel "Sünn´, Maand un Deerns" up´n Markt.
Vull inspannt vun´t richtige Läben kaamt wü inne letzte Tied kuum noch dortau Uptritte antaunähmen. Wü kriegt avers jümmers noch wat tau Standn. 2011 hebbt wü ganz grooden Kram in Angriff nahmen: "Plattdüütsch A-Cappella mit ganz väl Instrumenten"... Goode Fründn, de wü in all de Johrn up un näben de Bühn fundn hebbt, - Musikers ut de ünnerscheedlichsten Richtungen vun Gospel, Blues, Country, Bluegrass, Skiffle, Folk un Jazz bit hen na Knackigen Rock, hebbt mit uns tausammen de Plattdüütsch-CD överhaupt upnahmen: "Mang uns Fründn" is denn 2012 sotauseggn een musikalische Twischenbilaz wordn.
Wü hofft blossen, dat dat nich ok een Schlusspnkt is, denn eegntlich sünd wü leevhaftig up de Bühn de högere Genuss. An' dullsten begeistert weern de Lüüd vun uns' Upführungen mit Gerd Spiekermann, de twischen uns' Leeder siene Döntjes vördragen het. Dat dullste Kunzert ut düsse Reeg harrn wü in't utverköffte Ohnsorg-Theater. Ok süss findt Charmonia jümmers 'n begeistertet Publikum. Dat spält ok keen Rull ob wü inne Kirch, up 'n groode Kunzertbühn ode bi de Lüüd inne Stuv tau de Fämiljenfier singt. Wü kennt uns gaud, wiel dat wü tausammen upwossen sünd, un de Spoß anne Musik steiht jümmers baben an. - Un dat is woll de Funken de denn uns Publikum anstickt. Dat pässiert nu avers höchstens noch mol spontan bi irgndeen taufällige Gelägnheet.
2019 hebbt wü mit neije Leeders richtig Upwind kreegen. Corona het uns avers in de nächsten twee Johrn gewaltig utbremst. Wü hebbt Avstand hoolen, ok vöreenanner un minnicheen het in de Tied neije Hobbies fundn. Annern sünd krank ode old un klapprig wordn, so dat wü nu swoorn Hartens seggn mööt: Wü künnt keen Uptritten mehr annähmn.